Annus
2 0 1 2


MORTUUS EST ANTONINUS GUERRA,

Mortuus est Antoninus Guerra, magister poësis et cinematis

Antoninus Guerra, praeclarus poeta et scriptor scaenarum, Sancti Archangeli, in oppido provinciae Arimini regionis Aemiliae-Romaniae, ubi natus erat, die XXI mensis Martii obiit nonagesimo secundo anno aetatis. Quo loco vixit usque ad dimidiam partem sexti decennii prateriti saeculi; magister scholae primariae, captus a Germanis Secundo Bello Mundano relegatus est in campum captivis custodiendis apud Troisdorf; hic se congregavit cum nonnullis comitibus captivitatis Romandiolis natione qui vespere ab eo soliti erant petere, ut fabulas lingua dialecti usus narraret ex more rustico suorum locorum. Deinde, cum laurea corona ornatus esset de disciplina pueros educandi apud Universitatem Urbinatem, publicavit iam anno MCMXLVI carmina inscripta in lingua Romandiola “Scarab’occ”, (Latine “Informes notae”) sed relicto vetere more ceterorum poëtarum loci, in versus dialecti animum nostrae aetatis induxit.

Cum postea Romam se contulisset, hic triginta annos degens, scriptor scaenarum operam dedit pelliculis praeclarorum spectaculi cinematographici dispositorum, inter quos De Sica, Monicelli, Antonioni, fratres Taviani, Rosi, Fellini. Magno auxilio fuit operi “Amarcord” (Memini), ubi eximius dispositor scaenarum Fridericus Fellini suam pueritiam et mores civitatis Arimini quarti decennii praeteriti saeculi enarravit.

A nono decennio saeculi XX vitam egerat in oppidulo Pennabilli sito in extrema regione, artibus deditus, servans monumenta derelicta (“Loca animae”), colens fructus neglectos et prope amissos (“Hortus fructuum qui  e memoria excesserunt”). Cum in matrimonium duxisset mulierem Russam pluries itinera fecit in Russiam ac saepe se Moscoviam contulit. Nuper in oppidum patrium redierat, iam aegrotus, suum vitae exitum, ut existimari potest, prospiciens.

Hic invenies Antonini carmen in linguam Latinam conversum:

http://ephemeris.alcuinus.net/poesis.php

Scripsit Lydia Ariminensis



Retro ad:

Novissima editio
Summum paginae