Annus
2 0 1 2


DE HORRENDA PUEORUM CAEDE

De horrenda puerorum caede

Adamus Lanza, adulescens viginti annorum, mente alienatus, in civitate Connecticut, Oppidi Novi (Newtown), circiter centum kiliometra a Novo Eboraco infandam caedem apud scholam puerilem patravit: XXVII perierunt ex quibus XX pueri variae aetatis inter quintum et decimum annum. Armis instructus , ante triduum in scholam irrupit ubi ipse discipulus fuerat, ubi mater magistra erat quae a filio domi eodem mane occisa erat. Horribile dictu, arma ipsi matri erant, eorum studiosae collectrici. Adulescens nigris vestimentis cum thorace antiglandario et quattuor armis ignivomis quasi ad bellum se conferret, centum saltem glandes metallicas caeco impetu emisit; iam ingrediens, statim praesidem et scholae psycologam occidit. Sed atrocior internecio parvulorum facta est: totus grex ludi infantilis iam non nominatim appellatur, quia non respondere potest. Postea cognitum est de maxima magistrarum duarum virtute: altera complecta discipulos usaque corpore ut scuto usque ad extremum exitum defendit; altera ianuam conclusit et XX discipulos abditos in armariis servavit; praeses autem antequam occisa est periculum sonitu conclamavit.

Scelestus mortuus in ludo inventus est: incertum est utrum sibi letum consciverit an occisus sit. Praeses Obama cives lacrimans adlocutus est ac tam acerba funera deploravit, etiam magistras aliosque qui immerito perierunt commemorans. Interea controversia exorta est de usu armorum ac de nimia commoditate ea comparandi.

Scripsit Lydia Ariminensis



Retro ad:

Novissima editio
Summum paginae