Signa pactionum

Praesidens Aegyptiorum Mahometus Morsi decreto mutando, quo amplissimas facultates sibi tribuerat, promptus est: hunc nuntium retulit minister primarius Hisham Kandil; exercitus interea omnibus factionibus politicis suadet, ut colloquia pacis gratia habeantur, ne in peiora patria incidat. Acta diurna Pyramides (Al-Ahram) adfirmat decretum praesidentis probatum esse, quo exercitui munus tribuatur cum astynomis tranquillitatem publicam usque ad suffragia servandi .

Solis die Cairi post noctem quietae reclamationis, obsident centena oppositorum sedem praesidentis in insula Heliopoli, militiis curribus flis spinosis circumpositis inaccessibilem. Maxima factio oppositorum Frons Salutis Nationalis, a Mahometo El Baradei ducta, negat colloquia sic stantibus rebus, militibus videlicet adgrediendo paratis, habenda esse.

Scripsit Herimannus Novocomensis