Natio Palaestina apud Nationum Unitarum coetum ut civitas observans accepta est
 Natio Palaestina apud Nationum Unitarum coetum
... ut civitas observans accepta est
Ante triduum, consilio maximi momenti capto, apud Palatium
Vitreum Novi Eboraci ab Unitarum Nationum coetu Palaestinorum
natio accepta est ut “res publica observans”, non
particeps. Quod decretum est CXXXVIII sententiis Palaestinis
faventibus, cum IX nationes adversae essent, XLI quae suffragium
ferre noluissent. Civitates Americae Unitae quae obstiterunt
quominus natio Araba admitteretur, putant consilium non auxilio
fore ut ambae res publicae condantur idemque iter de utriusque
nationis pace difficilius redditum iri. Italia nonnullis horis
ante suffragium suam exceptionem solvit atque consilio assensit;
qua re civitatis Israëlis legatus apud sedem Italicam ait suum
populum maxime deceptum esse. Contra Administer auctoritatis
nationalis Palaestinae (Anp) ad extera negotia praepositus
Riad Maliki declaravit pro consilio capto se laetum esse et
Italiae administrationi gratias agere velle.
 Ante suffragium Minister
Primarius Italicus telephonice cum Netanyahu Praesidente
Israëlis collocutus erat erga eius rem publicam amicitiam ac
praesidium confirmans ne in iudicium omnium nationum ob scelera
bellica ad commodum politicum vocaretur. Interea gravis nuntius
vulgatus est, quasi Nationum Unitarum consilii capti ultio, de
novis coloniis quas prope tria milia Israeliani condituri esse
feruntur in territorio quod inter Ierusalem partem orientalem et
Iordanem flumen interest. Non aër pacificus illic spirat.
Scripsit Lydia Ariminensis
|
