Magna procella Civitates Unitas procumbit

Omnes toto orbe aciem hesterno die Novum Eboracum intenderunt, ubi tempestas “Alexandra” (Sandy) nuncupata epicentrum habitura esse putabatur. Imagines televisificae magnam vim ostenderunt quae in Americae litus spectans inter septemtriones et orientem solem incidit. Undae levabantur aliqua metra et vicus Manhattan inundabatur usque ad genua. Qua re scholae, universitates et nummis mercandis sedes (Wall Street) clausae sunt. Etiam vehicula publica retenta sunt.

Praeses Baracus Obama hortatus est cives ut praeceptis auctoritatum obsequerentur: manendum domi esse, si necesse, aedes relinquendas. Vim electricam posse deficere; propterea vestibus spissis tegi opus esse atque cetera remedia apparanda esse. Civitates Unitas iam peiores calamitates susceperunt, ut ait Obama ad cives confirmandos.

Post noctem qua tempestas ad summum gradum pervenit, hodie gravissimum discrimen transisse videtur; omnia vastata et detrimenta ingentissima accepta sunt praesertim in civitatibus Novo Eboraco, New Jersey, ubi “status magnae calamitatis” a Praesidente Obama declaratus est; etiam Maryland, Carolina Septentrionalis, Virginia occidentalis, Connecticut, Pennsylvania multa damna passa sunt. XVII saltem perierunt. Ad summam quingenties centena milia sine vi electrica manserunt , sed lentissime res in melius mutatur. Magna procella nunc “tempestas tropica” nominata est vel etiam “perfecta” cum in aere Novi Eboraci convenisset mutationem caeli adversam ex septentrione advenientem. Minae permanent: Civitas New Jersey omnino sub aquis est. Interea praeconium comitiale intermissum est. Post septem dies comitia de Praesidentis electione habebuntur; incertum est an tum damna expletura sint.

Scripsit Lydia Ariminensis