Annus
2 0 1 2


20

d.20. m.Oct. a.2012, h.08:50

Signum Pechiniensibus missum

A Civitatibus Unitis mitti naves planigeras in Mare Austrosinicum

Civitates Unitae augent vim suam militarem in regione marinā ante Chinam australem sita: Navis planigera, quae appellatur "USS George Washington", in hanc regionem mittitur. Hōc modo Americani manifestant potestatem suam Sinensibus – qui litigant de insulis Senkaku cum populis propinquis, velut cum Iaponibus.

 

En signum clarum: In litigatione, quam China habet cum aliis civitatibus asiaticis, Civitates Unitae vim suam militarem manifestant. Ab exercitu US-Americanorum marino navis planigera energiā atomicā operans, quae appellatur „USS George Washington", mittitur in Mare Austrosinicum.

Vassintonio ex urbe – In litigatione territoriali, quam China habet cum aliis civitatibus asiaticis, Civitates Unitae manifestant vim suam militarem. Ab Americanorum exercitu marino navis planigera energiā atomicā operans, quae appellatur "USS George Washington", mittitur in Mare Austrosinicum. Hac nave bellicā mittendā gubernatio Vassintoniensis clarum signum ostendit Pechiniensi.

 

"Insulae Diaoyu pertinent ad Chinam": Nemo non intellegit, quid his verbis postuletur. Gubernatio Pechiniensis sentit Iaponibus nullum esse ius illarum insularum in Mari Orientali-Sinico sitarum, quae appellantur Senkaku. Ex decenniis de his insulis litigatur, generationes politicorum usque nunc frustra conati sunt lites componere. Civitates Unitae in hac regione augent vim suam militarem.

China de nonnullis insulis huius regionis possidendis litigat cum Vietnamiā et Philippinis aliisque terris. Simul Civitates Unitae foedera pangunt oeconomica atque militaria cum minoribus civitatibus huius regionis, qui sperant hōc modo se servatum iri a Sinensium potestate crescente oeconomicā atque militari.

Americani in hac regione vim suam militarem inter exercitia strategica facienda insigniter exauxerunt. Denny Roy analysta militaris agenturae AP dixit haec: "Civitates Unitae mittere volunt signum, quo patefiat se ad tempus longius in hac regione operam daturos esse".

 

Lis, quae fit de grege insularum in Mari Orientali-Sinico sito, exacerbatur: Et Iaponia et China postulat, ut hae insulae sibi addicantur.

 

China ipsa die Veneris etiam fecerat exercitium in Mari Orientali-Sinico. Xinhua agentura nuntiorum officialis nuntiavit huius exercitii participes fuisse undecim naves octoque aeroplana. De copiarum motionibus nihil innotuit accuratius.

 

Porro nuntiatum est hoc exercitium coordinatum* esse cum magistratu piscatorio et agenturā maris custodiendi. Xinhua rettulit tempore praeterito naves extraneas ursisse et persecutas esse naves utriusque magistratūs.

 

Martis demum die aeroplana Iaponum militaria vidisse septem naves bellicas Sinensium haud procul versantes ab insulis, quae in Chinā appellantur Diaoyu et in Iaponiā Senkaku. Gubernatio Pechiniensis dixit has naves ibi versatas esse exercitii usitati causā. Mense Septembri in China aliquot decem milia hominum manifestaverant se sentire bellum esse cum natione propinquā gerendum.

 

Nunc classis navicularum piscatoriarum Sinica iter facit ad gregem insularum, quae in Chinā Diaoyu et in Iaponiā Senkaku appellatur. Hoc photographema factum est anno 2000 (bis millesimo).

 

In urbibus Sinicis, velut in Shenzhen, factae sunt reclamationes anti-iaponicae, quia Iaponia insulas, de quibus litigatur, vult emere a possessore privato.

 

Hic vir vexillo Sinico manifestat se reprobare rationem politicam gubernationis Tochiensis.

Etiam in urbe Chengdu factae sunt manifestationes anti-iaponicae.

 

Hi manifestatores cum vexillis Sinicis per vias iter faciunt. Chinā et Iaponiā inter se litigantibus etiam Civitates Unitae excitati sunt.

 

Propter reclamationes continuas Iapones fabricatores rerum electronicarum Sinenses in tempus aliquantum clauserunt officinas suas tabernasque.

  • +coordinare, -o, -avi, -atum

 

Hanc relationem d.20.m.Oct., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domūsque editoriae, quae appellatur LEO LATINUS: http://www.leolatinus.com/

Titulus originalis est: „Signal an Peking – USA schicken Flugzeugträger ins Südchinesische Meer".

Scripsit Nicolaus Gross



Retro ad:

Novissima editio
Summum paginae