Autocinetum displosivum Beryti diruptum est

In Libano belli civilis eventus tragici redire videntur, cum ante biduum autocinetum pyrobolo dolose instructum, explosum Beryti in vico incolarum Christianorum Ashrafieh nominato, magnam caedem effecerit. Ob insidias VII perierunt et etiam Wissam al Hassam, dux occultae securitatis munerum, qui investigationi de petitionibus tromocraticis in Terra Cedrorum a Syriacis patratis operam dederat. Episcopo urbis capitis timor est ne Libanenses in discrimen Syriacum trahantur. Petitio ab auctoritatibus Damasci reprehensa est necnon a factione Siita Libanensi Hezbollah, sed factionis Sunnitae fautores vehementer tumultuati sunt. Qui iam fuerat in Syria rector religionis Sunnitae Saad Hariri affirmavit Assad auctorem insidiarum esse.

Diruptio effecta est apud Forum Sassin, a quo non longe sinus Christianorum est. Eodem prope loco ante XXX annos Bashir Gemayel, Praeses electus, nondum in munere constitutus, pyrobolo disploso tempore gravissimo belli civilis necatus est, e sede factionis Christianae Phalangis cum exiret.

Diruptio tam vehemens fuit ut in viae bitumine cavum perforaverit unum passum latum. Numerus mortuorum, ut putatur, aucturus est, cum, ex LXXXVI sauciatis, complures se graviter habere feruntur.

Scripsit Lydia Ariminensis