Quomodo quattuor foede in Sabaudia perierint

Quattuor qui perierunt caede confecta priore die Mercurii in Sabaudia occisi sunt in capite acceptis ictibus teli ignivomi, ut ait Henricus Maillaut, quesitor oppidi Ennesiae (Annecy). Inspectiones secti cadaveris ostenderunt illos iterum vulneratos esse sed omnes interisse duplici plaga in caput infixa. Nihil aliud ab eo vulgatum est nisi quod cadavera quam primum propinquis reddentur. Interea familiares in Francogalliam a Britannia pervenerunt ut solacium duabus puellis praeberent quae mire neci superfuerunt . Quarum parentes occisi sunt, pater Saad al Hilli, civis Britannicus ab Iraquia oriundus, mater Ikbaal, sed etiam ava et birotarius forte illuc praeteriens. Certa agnitio ab ipsa puellula quattuor annorum effecta est quae a corpore matris tecta incolumis evaserat, soror autem octavum annum agens graviter sauciata est. Quaesitor declaravit prope divinitus puellulam maiorem aetate superfuisse vulneribus illatis, quae adhuc in nosocomio sopore morboso iacet, apud quam propinqui et publici custodes adsunt constanter ad eam tuendam.

Quae infandae caedis causa est ? De hereditate privata ultio putatur.

Scripsit Lydia Ariminensis