Conservativus Mitti Romney vicarius

Paulus Ryan creabitur candidati praesidentialis Mitti Romney vicarius: hoc publice nuntiabitur Saturni die in Virginia. Paulus Ryan, XXXXII annos natus, admodum conservativus esse putatur: quod videlicet Mittus Romney sibi magno auxilio fore retur ut praesidentem munere fungentem assequatur, qui usque ad hunc diem praestare videtur.

Paulus Ryan ex Visconsinia, qui aulae legatorum (*) consilio oeconomico praeest, annis recentissimis consilia democraticis contraria proposuit, ut vectigalia, auxilia victualia et mercedes seniorum deminuantur et lex de aegrotis adiuvandis commutetur: qua ratione putant conservativi quaestus plurimos creandos esse. Cum Civitatum Foederatarum cives rerum oeconomicarum in peius vertentium admodum solliciti sint, observatores putant delectum hunc candidato republicano oportunum esse, qui etiam aequare voluerit magistratum suum praeteritum in Massachuseta, civitate ubi opiniones liberales praevalent.

(*) House of Representatives

Scripsit Herimannus Novocomensis