Kofi Annan se munere abdicavit

Kofi Annan legatus Unitarum Nationum Coetus etiamque Foederis Arabi, qui mense Februario praeterito curam susceperat ut interpres pacis discrimen Syriacum solveret totius orbis civitatum potentiorum subsidio confisus, a munere abdicavit, cum actiones non accepisset ad auxilium ferendum. In sua symbola quae inscripta est “Meum consilium ultimum” Kofi Annan aperte scribit Barak Obama Praesidem Unitarum Civitatum Americae et Wladimirum Putin, PraesidemRussiae tam forti animo esse debere tantaque auctoritate ut Syriam servent; nam difficilem tempestatem non instrumentis bellicis expediri posse. Ex sententia peritorum de re politica iam Civitates Americae, ut etiam Turcia, Arabia Saudita, Qatar, rebelles adiuvant, quamvis auxilia non mortifera praebeant.

Concilium Commune Unitarum Nationum Coetus hesterno die, exceptis Sina Russiaque praeter nonnullas civitates, consilium cepit ut progredientem actionem bellicam in Syria eodemque tempore inertiam Consilii de Securitate reprehenderet propterea quod nullo modo Damasci adfuisset.

Interea res in dies graviores fiunt: Damascus in potestatem militum regiminis redacta est, pyroboli adhuc decidunt in urbes Emesam (Homs) et Beroeam (Aleppo) ubi acerrime cotidie pugnatur; die Veneris ad orandum dedicato Beroeae publicus concursus factus est ut regimini reclamaret. Milia mortuorum belli intestini non iam enumerari possunt; incolae a suo loco dimoti vicies centena milia computantur.

Scripsit Lydia Ariminensis