Annus
2 0 1 2


Removal of Paraguay'

Non placet amotio praesidentis Paraguaiae

Regimina Argentinae, Brasiliae et Uraguaiae iram suam enuntiaverunt ob praesidentem Paraguaiae Ferdinandum Lugo amotum, primum sinistrae parti faventem eius nationis (quem in imagine adposita acriter cum diurnariis eloquentem aspicere potes): quem Veneris die fere omnium consensu senatus accusavit cruenti exitus perturbationis publicae, qua XVII homines interierant. Friderico Franco, Ferdinandi antea vicarius, munus praesidentis confestim commissum est: qui proclamavit nullam democraticae regulae violationem exstitisse et secundum legem consilium illud captum esse; confessus est inde discidia cum finitimis nationibus exorta esse, quarum cum praesidentibus quam primum collocuturus sit rerum explicandarum gratia.

Quod haud facile fore videtur: Argentinae praesidens iam dixit regimen suum repentem mutationem minime agniturum esse, Brasiliae minister rerum externarum petiit ut apta poena Paraguaiae novi rectores afficerentur, Aequatoriae praesidens palam de democratia oppugnata loquitur, Hugo Chavez Venetiolanus novum praesidentem illegitime creatum appellat; Colombiae, Mexici et Chiliae nuntii conqueruntur, quod tempus praesidenti defuerit pro se dicendi. Cautius Hispaniae et Civitatum Americae Unitarum regimina eloquuntur, democratiae principia servanda esse admonentia.

In perturbationibus in regione orientali Canindeyu die XVI mensis Junii, custodes publici a praesidente Ferdinando Lugo missi cum agricolis eorumque familiis terras occupantibus proelio commisso magna caedes utrimque facta erat.

Scripsit Herimannus Novocomensis



Retro ad:

Novissima editio
Summum paginae