De nomadum secessione in Mali

Motus Nationalis Liberationis regionis Azawad in Mali nuper renuntiavit hanc partem Africae Septentrionalis suis legibus uti; quod declaratum est in situ interretiali Motus (MNLA), sed Unio Africana id infirmavit, admonens ceteras nationes ne ratam haberent novam rem publicam. Quae regio sedes nativa est nomadum desertorum quibus nomen est Tuareg, qui seditioni favisse putantur. Rebelles iam in sua potestate territorium amplius quam Francogalliam habere feruntur, inclusis urbibus Kidal, Gao et Timbuctu, capite antiqui et opulenti regni. Ut videtur, auxilio seditiosorum fuerunt Muslimi secuti severiorem legem Coranicam, auctore Al Caëda, cum res publica Malensis mitiore iure Islamico regitur.

Bellum civile iam publicum discrimen suscepit, maxime de pueris. Periculum quo versantur LX milia puerorum effecit ut societas proclivis ad humanos sensus cognominata“Terrae hominum” (Terres des hommes) in miseriis infantes sublevarent qui, incepta seditione, in campos profugis recipiendis rerum publicarum Burkina Faso et Mauritaniae confugissent. Ad quod eventum adversum etiam nutritio defectiva diuturna accedit ob inopiam terrarum Malensium. Nuntiatum est ab “Amnestia inter gentes” (Amnesty International) rem publicam proximam esse calamitati humanae; partem Septentrionalem Malensem in omnium rerum confusionem demergi: plura dena milia familiarum ad nationes finitimas vel ad partem Meridionalem fugae se commisisse; eodem tempore homines Tuareg effugisse nuntiantur ab urbe capite Bamako in liberam regionem versus.

Scripsit Lydia Ariminensis