De Curdis in Turcia reluctantibus

Quindecim mulieres, omnes sociae Factionis Laboristicae Curdistaniae, occisae sunt dum cum Turcicis biocolytis proeliantur: cruenta caedes in regione Bitli perpetrata est, ubi Curdi pro libertate pugnant, ut a regimine Ancyrano secedant. Mulieres enim virorum more apud populum illum militare solitae sunt.

Curdi, novi anni principium iuxta ephemeridem suam celebrantes, catervatim contra regimen Turcicum per fora viasque reclamaverant. Ante paucos dies tredecim homines, quorum septem rebelles, sex astynomi, in provincia Sirnace interfecti erant; Amidae, in urbe plerumque Curda, in viis dimicatum erat et custodes publici vaporibus lacrimigenis multitudinem repulerant.

Ab anno MCMLXXXIV myriades victimarum in Curdorum pugna pro libertate numerantur.

Scripsit Herimannus Novocomensis