De puerorum caede in cuniculo

In pagi Vallesiae cuniculo, quod Sirrum oppidum attingit, die Martis immanis calamitas viaria facta est: raeda enim Sedunum versus iter agens LII periegetas transportans, quorum magna pars pueri et puellae tertium et decimum annum agentes erant, ob ignotam causam de via devertit et cuniculi pariete illiso subversum est. XXII adolescentes, sex adulti interierunt, ceteri gravibus vulneribus affecti in nosocomium advecti sunt. Omnes ex duobus vicis Flandris in nivibus Alpinis dies feriatos egerant. Ambo viri, quibus raedam gubernare contigerat, interierunt.

Turma adiutorum in locum stragis confestim accurrit totamque noctem auxilium tulit: numquam tanta calamitas in Vallesia memoratur. Aliquot psychologi ab auctoritatibus Helveticis missi adsunt, qui victimarum parentibus et propinquis solacium afferant. Minister primarius Belgicus Helius Di Rupo luctu perturbatus in Helvetiam celeriter se contulit.

Scripsit Herimannus Novocomensis