De navis transoceanicae naufragio apud insulam Italicam

Ingens navis periegetica “Concordia” societatis “Costa” nudius tertius saxis abditis in mari impacta est cum abesset circiter centum passus Tusciae “Insulae Lilii” a litore. Nunc ostendit se reclinatam ac submersam ab uno latere ut balaenam apud oram exanimem. In navi circiter quattuor milia et octingenti vectores impositi erant haud exceptis nautis. Usque ad hoc tempus tres mortui in aquis inventi sunt et quindecim feruntur non reperti esse; hoce die post meridiem duo cadavera senum in diaetis conspecta sunt. Continenter petitur in navis parte non demersa a spelaeologis ac subaqueis spe incolumes inveniendi. Calamitas naturae locorum creditur vitari posse nec in aquas liquor propulsorius dispersum iri.

Cur navis tanta magnitudine proxime accessit ad litora? Ut videtur, mos est ut nautae iter maritimum conficientes cursum navium dirigant ad insulae portum ut incolas salutent. Auctoritates iamnunc existimant praefectum navis erravisse non solum quod nimis ad litus navi appropinquaverit sed etiam quia in tutum pervenerit ante eos qui vehebantur cum milites maritimi pluries eum hortarentur ut rursum navem conscenderet ad officium implendum ; ad hoc non praetermittendum est quin ille sero in auxilium oppidorum propinquorum custodes maritimos advocaverit. Quibus de causis dum indagatur in vincula coniectus est.

Scripsit Lydia Ariminensis