Cadavera violata

Indagatores USAe classiarorum investigare coeperunt de imaginibus per interrete circumvagantibus, quibus quattuor milites in cadavera trium Talibanorum mingentes ostenduntur, cum unus ex militibus se oblectantibus mortuo vale iucundo ore dicat. Solliciti sunt enim rectores Civitatum Americae Unitarum, quid totius orbis Muslimi de obscaenis factis sentiant. Minister Americanus rebus externis addictus dixit facta neque classiarios Americanos decere neque indicium esse concivium suorum opinionum. Zabihullah Mujahed, nuntius Talibanorum, talia facinora barbaris digna saepe recentibus annis perpetrata esse effatus est sed non divulgata.

Verentur USAe rectores, ne tantis iniuriis tam vehementer Muslimi in toto orbe resistant, quam saevitiei militum in carcere Abu Graib anno MMIV perpetratae.

Scripsit Herimannus Novocomensis