Promotor televisificus  Marius Kreutzberger vocatus in ius

In America meridionali et septentrionali inter notissimos, qui televisifice agunt, Marius Kreutzberger (Franciscus ad scaenam nominatus) prae ceteris excellit, iam annum vitae suae septuagesimum agens. Is nunc a quodam mercatore, cui nomen Patricius Flores, in ius vocatus est causa paternitatis, nam Flores, fere quadraginta annorum, postulat se illius filium esse; iudex imperavit examen per acidum disoxirribonucleicum (ADN) fieri, ex quo compertum est ambos nulla consanguinitate esse coniunctos neque idcirco Marium esse patrem Patricio. Is tamen, qui affirmat a matre sua certissimum de re factum esse, iterari examen ex lege postulavit.

Hic quidem casus, nisi de notissimo promotore televisifico ageretur, in publicum non esset adductus neque diurnarii Marium Kreutzberger ad tribunal conventum avide petiissent. Exinde, ut fieri solet, quidam inita causa et examine ADN adhuc incognito iam reum condemnaverant; multi tamen faverunt promotori, qui maxime timet ne fama sua televisifica hanc ob causam deletum iri; itaque decrevit rem statim aggredi et ad tribunal cito stare. Nunc reliquum est ut novum examen per ADN agatur, ex quo publica opinio maxime pendet.

Scripsit Paulus Kangiser