De itinere in Graeciam discipulis erudiendis

Pars tertia - Athenae

Deversorium apud quod recepti sumus, satis amplum, hospitium praebet multis discipulorum comitatibus ab universa Europa. Post cenam discipulis plerumque non gratam ob alimenta acri gustatu quibus non assueti sunt, pars eorum cum magistris ad mediam urbem hamaxosticho subterraneo discedit, ut miretur in Foro Constitutionis (Syntagma) vicem custodum ex antiquo more Graecorum ante monumentum Militi Ignoto dicatum; Parthenon, electrica vi illustratus, ab alto, ut pallida umbra, a praesenti tempore ad gloriam non perituram Graecitatis nos reducere videtur. Post somnum laboriosum ob discipulos Hispanicos clamantes usque ad intempestam noctem insequenti mane Athenarum peragratio incipit. Nisi esset Parthenon imminens urbi, Athenae similes ceteris oppidis Europae viderentur; litterarum formae vero in praeconiis antiquitatem evocant, licet litterarum locutio differat ab antiqua, ut a sermone ducis periegetici exstat. Dum ad Musaeum Archaeologicum Nationale raeda cursuali vehimur, ille nos edocet, quod iam omnibus constat, de difficili tempestate oeconomica suae patriae; ob ingens aes alienum rei publicae stipendia minuta esse et coactam operis vacationem crevisse; qua re reclamationes vehementes a civibus saepius fieri. In muris aedificiorum identidem legimus: “Locatur”, “Venum datur”, quae inscripta gravis discriminis oeconomiae indicia sunt.

Longum est enumerare statuaria apud Musaeum exposita digna quae admiremur: sed nonnulla tantum memoria tenebimus: num potest praetermitti magnum simulacrum aeneum Nectuni firmo pectore tridentem coniecturi? An congruentia partium ephebi inventi superiore saeculo apud oras Peloponnesiacas qui fictus esse existimatur ex Polycleti disciplina, cum pars corporis stare videatur, altera pede ac brachio motum simulare? An equus puerum vehens, tamquam magno concursu quod obstet transiliret? Sed iam tempus est abeundi. Ad Acropolim ascendendum est. Quod superest signum magni momenti est arti et civili cultui Europae, sed novimus antiquo tempore aliter ac nunc antiqua monumenta ac simulcra apparuisse, non candida, ut hodie plerumque a nobis conspiciuntur, sed variis coloribus, venustissima visu. Quae sub eorum oculis sunt, ea discipuli plerumque ex libris didicerunt vel magistri explanaverunt: fieri non potest quin commoveantur magnitudine atriorum, magnificentia Parthenonis, quamvis pars eius lateat ob contabulationem operis reficiendi, pulchritudine Erechthei  cum Caryatidibus, id est cum feminis columnatis; ab alto licet loca mirari ubi publica negotia tractabantur, Areopagum, Pnycem, forum antiquum, licet longe spectare montes Lycabettum e Himettum, aedificia urbis hodiernae usque ad Pyraeum.

Post meridiem maxima discipulorum pars manet in media urbe ut paret in tabernis memorialia amicis et familiaribus donanda post reditum, parvus grex autem ad novum Musaeum Acropolis devertit, nuper exstructum, ubi visitatoribus omnes reliquiae inventae apud Parthenonem ceteraque monumenta Acropolis exponuntur, quamvis ex iis plurimae permaneant apud Britannicum Musaeum unde auctoritates Britanniae negant eas auferendas et reddendas esse Graecis. Statuaria optime collocata sunt in tribus tabulatis instar spatii Parthenonis. Post cenam altera pars quae superiore vespero mansit in deversorio in Forum Syntagma se confert, magistris comitantibus et duce periegetico, cum non opportunum videatur in peculiarem vicum Plakam nocte adire, quod quaerebatur ab alumnis. Ambulatur igitur viis non crebris peregrinatoribus foro finitimis usque ad extremum tempus diei.

Scripsit Lydia Ariminensis