Annus
2 0 1 1


PRAEBITOR PECUNIAE  CAUSA PRAECONII  AD REFICIENDUM COLOSSEUM INVENTUS EST

PRAEBITOR PECUNIAE CAUSA PRAECONII AD REFICIENDUM COLOSSEUM INVENTUS EST

Colosseum vel Amphitheatrum Flavium, ingens monumentum antiquitatis Romanae ubi spectacula gladiatoria, venatoria, bellica, naumachiae, dramata mithologica praebita sunt, mox restituetur. Imperator Vespasianus curavit amphitheatrum faciendum anno LXXII p. Ch. n.; quod perfectum est a filio Tito annis octo post. Aptum fuit ad recipienda quinquaginta milia spectatorum. Media Aetate Colosseum nominatum est a propinqua statua immani magnitudine Imperatoris Neronis quae, postquam memoria ipsius oblitterata esset, Deo Soli dicata erat. Corrupto imperio Romano, magna pars, ablata, materiarum rursum adhibita est. Ab anno MCMLXXX insertum est in catalogum monumentorum quae Patrimonia Humanitatis existimantur. Ergolabus Diego Della Valle cum Ministro Cultus Bonorum pactus est ut offerret viginti quinque milliones euronum pro Colosseo. Omnes auctoritates, inter quas praesertim Gianni Alemanno Praefectus Urbis, magno gaudio affectae sunt.

Opus reficiendi ad aliquas partes monumenti pertinebit: prospectus spectantes ad septentriones et meridiem, nova saepimenta fornicum primi arcuum ordinis, ambulacra primi et secundi ordinis, hypogea; praeterea apparatus electricus renovabitur , munera publica demum in melius mutabuntur: quae opera conficientur in omnibus partibus eodem tempore intra proximum biennium vel triennium. Ut ab archaeologis putatur, etiam recondita in reficiendo inveniri possint.

“Gravis cura finem habuit - inquit Alemanno - magnaque spes incipiet. Iampridem praedixeram necesse auxilium privati qui hoc munus sibi sumeret pecunia publica carente”. Praebitor pecuniarum autem promisit se in monumentum nullam tabulam immani latitudine pictam ut praeconium calcei (Tod’s) in suis domibus fabricatoriis effecti impositurum esse. Dum opera conficiuntur nihilominus visere Colosseum licebit cum maxima pars vectigalium ex plurimis huiusce visitatoribus colligatur. Nihil opportunius quam novos adiutores invenire qui praebeant argentum praeconii causa (in lingua Anglica “sponsor”, quae vox prorsus Latina est): de ceteris monumentis eadem spes est.

Scripsit Lydia Ariminensis



Retro ad:

Novissima editio
Summum paginae