Annus
2 0 1 1


Post LVI annos de tabulis bilinguibus in Carinthia constituendis convenit.

POST LVI ANNOS DE TABVLIS BILINGVIBVS IN CARINTHIA CONSTITVENDIS CONVENIT

Carinthia bilinguis?

Pace anno MCMLV inter Austriam et victores belli mundani secundi facta convenit, ut Slovenis Croatisque in finibus Austriae viventibus certa iura darentur, in quibus ius tabularum bilingium in regionibus bilinguibus. Quae tabulae cum in provincia Pannonia occidentali (Burgenland) nullo repugnante constitutae essent, a magna parte populi Carinthiani pernegabantur ea de causa, quod multi timebant, ne Iugoslavia, sicut post bellum fecerat, regiones ita notatas vindicaret. qui timor cum vanus esset, tamen anno MCMLXXII, cum Bruno Kreisky cancellarius foederalis CC fere tabulas bilingues in Carinthia constitui iussisset, plebs excitata eas statim removit. Nova lege facta denique constitutum est, ne quae tabulae bilingues statuerentur, nisi plus XXV centesimae Slovenorum in ea civitate habitarent. Ex qua lege XCI tabulae bilingues constitui debuerunt, tamen re vera LXX fere tabulae constitutae sunt. Anno MMI summi iudices rei publicae, ad quos Sloveni appellaverant, illam legem ex parte sustulerunt iudicantes X fere centesimas Slovenorum ad tabulas constituendas sufficere. Cui iudicio imprimis Georgius Haider,qui tunc Carinthiae provinciae praefuit, vehementer repugnavit. Res solvi non posse videbatur, propterea quod moderatores rei publicae nil facere audebant, quod contra voluntatem Carinthiorum esset.

Quomodo Haider summos iudices neglexerit, ex eo apparuit, quod tabulis Theodiscis minores adiunxit, in quibus nomina Slovenica erant inscripta. Quas tabulas adiunctas iudices scilicet non legitimas esse iudicaverunt. Sed Haidero mortuo omnes paratiores esse videbantur ad hanc causam perpetuam finiendam, cuius plurimos iam pertaesum est. Quin etiam eae sodalitates, quae memoriam eorum colunt, qui pro Carinthia integra pugnaverant, consensui non iam restiterunt.

Omnibus assentientibus nunc tandem convenit, ut in CLXIV pagis tabulae bilingues statuerentur, deinde, ut populus Carinthianus sententiam diceret. Post tot annos etiam in Carinthia concordia facta esse videtur.

Scripsit Volfgangus Austriacus



Retro ad:

Novissima editio
Summum paginae