Mubarak infarctu myocardii affectus est

Hosni Mubarak, prior praeses Aegypti, in percontatione infarctu myocardii affectus esse dicitur. Id accidisse, cum quaesitores eum de corruptione deque potestate, quam abusus esset, inquirerent. Mubarak, senex LXXXII annorum, mense Februario multitudine regimini reclamante coactus erat, ut munere se abdicaret.

Ad eam percontationem Mubarak vehiculo loricato domo in urbem Al-Tur vectus esse dicitur. Ferunt eum primo in area militari exspectavisse, dum aedificium iudiciale, in quo inquisitio fieret, ab insidiis munita esset.

Actores publici ei crimini dant, quod peculatum fecerit, deinde, quod catervas verberatorum conduxerit, qui reclamantium occisorum insimulantur.

Ex a.d.III. Id. Feb. Mubarak cum duobus filiis in oppido Scharm el-Scheich versatur, ubi in custodia domestica tenetur. Mubarak crimen corruptionis semper negabat.

Scripsit Volfgangus Austriacus