Laurentius Gbagbo undique ab adversariis circumdatus est

Sectatores armati praesidis Alassane Ouattara hodie urbem Abidjan, caput Orae Eboris, aggressi sunt. Guilelmus Soro, qui regimini praeest, stationi televisificae Francogallicae „France 24“ dixit urbem obsideri, dum Laurentius Gbagbo, prior praeses, cladem suam confiteretur. In quadam urbis regione direptionibus factis milites Francogalli se ostenderunt. Asseclae Ouattarae sedem Laurentii Gbagbo circumdabant. Nonnulli legati in exercitu prioris praesidis ad partes Ouattarae perfugisse dicuntur. Ouattara ipse in oratione per televisionem emissa dixit sectatores suos non desinere pugnare pro democratia servanda et pro voluntate populi audienda.

Choi Young-Jin, qui legationi Nationum Unitarum UNOCI praeest, in televisione Francogallica dixit L fere milia vigilum publicorum Laurentium Gbagbo deseruisse; quem nullas iam copias habere nisi cohortem suam praetoriam.

Scripsit Volfgangus Austriacus