Regiminis consultum ultimum in Syria tollitur

Seditiosis urgentibus moderatores Syri constituerunt, ut lex de re publica defendenda (scil. consultum ultimum) tolleretur. Magistratus id iam decrevisse consiliaria praesidis Assad, Bussaina Schaban, Solis die declaravit. Ea lex per quinquaginta fere annos valebat.

Latakia Solis die fuit quieta. Moderatores magnum numerum militum in eam urbem miserant, qui eos locos custodirent, a quibus pridie insidiatores in gregem reclamantium sclopetaverant.

Diurnarii publici nuntiaverant XII homines per insidias occisos esse. Gregem armatum e tectis in praetereuntes sclopetavisse, ut discordia inter cives fieret. Quem gregem antea tumultum in urbe fecisse tabernasque incendisse.

Sodalitas iuribus civilibus defendendis cives ad operistitium generale hortata est. Iam Veneris et Saturni die plura milia hominum in urbibus Syris pro re publica mutanda et pro libertate civili reclamaverant. Adversarii regiminis dixerunt XL fere homines reclamantes a vigilibus publicis occisos esse; qui nuntius adhuc non comprobatur.

Scripsit Volfgangus Austriacus