Netanyahu summum ducem Iranianum Adolfo Hitler comparat

Beniaminus Netanyahu, primus minister Israeliae, cum Moscoviae commoraretur, Ali Khamenei, summum clericum Iranianum, Adolfo Hitler comparavit: „Hitler primum orbem terrarum expugnare voluit“, inquit, „deinde in arma atomica construenda intendit. Contra Khamenei, antequam orbem expugnat, arma atomica temptat.“

Dissensiones de consiliis atomicis Iranianis in ipso discrimine, in quo civitates orientales versarentur, etiamnunc valere, cum fieri posset, ut regimina fanatica islamica crederent illas res sibi usui fore. Consilia Iraniana toti orbi terrarum periculo esse, Khamenei ipsum hominem esse plenum odii fanatici.

Postridie caedis Hierosolymitanae Netanyahu Mahumeto Abbas, praesidi Palaestinensium, obiecit, quod de pace agere nollet. Eum quidem per totum orbem terrarum iter facere neque Hierosolymas venire. „Cur non colloquimur?“, inquit, „nos parati sumus ad colloquia.“

Abbas Martis die Moscoviae Demetrium Medwedew, praesidem Russum, convenerat. Russi ex multis annis id contendebant, ut pacem inter Israeles et Palaestinenses conciliarent. Quod Israeles Russos hortati sunt, ne diutius cum sodalitatibus islamisticis Hamas et Hisbollah agerent, minister Russus rerum externarum hoc desiderium abnuit.

Scripsit Volfgangus Austriacus