Quid Consilium Securitatis constituerit

• Consilium Securitatis civitatibus sociis potestatem dat facere, quodcumque iis videtur, ut cives Libyci ab impetu imminente serventur. Tamen copiis externis non licebit solum Libycum occupare.

• Consilium Securitatis constituit, ut civium servandorum causa omnes intra Libyam volatus vetentur.

• Consilium Securitatis civitates socias hortatur, ut ipsae huic interdicto exsequendo subsidio sint; quod etiam pertinet ad ius supervolandi concedendum.

• Consilium Securitatis constituit, ut omnes civitates aeronavibus, quaecumque in tabulis Libycis relatae sint, et avolatum et appulsum et supervolatum intra fines Libyae negent.

• Consilium Securitatis poscit, ut statim indutiae fiant, deinde, ne qua vis neve impetus iam in cives fiat.

• Consilium Securitatis civitates socias, praecipue civitates in ea regione sitas, hortatur, ut intra fines suos eas naves easque aeronaves inspiciant, quae aut e Libya veniunt aut cursum in Libyam tenent.

• Consilium Securitatis a magistratibus Libycis poscit, ut omnia faciant, quibus iure gentium se obligaverint, deinde, ut omni ratione cives servent atque eas res tueantur, quae ad vitam eorum pertineant.

• Consilium Securitatis dolet, quod concursus militum mercennariorum continuatur; quamobrem civitates socias hortatur, ut Libyam eo concursu intercludant.

Scripsit Volfgangus Austriacus