Bellum Civile Eburneanum

In Litore Eburneo, terra Africana, mense Novembri cives per suffragia  Praesidem  Allassanem Ouattaram elegerunt, qui fuerat minister primarius. Candidatus autem evictus Laurentius Gbagbo, qui ab anno 2000  Praesidis munere fungebatur, a praesidiatu discedere noluit; itaque utriusque sectatores aperte pugnant, adeo ut ab exteris testibus bellum civile coepisse iudicetur.  Ouattara vero ab Unione Africana, Unione Europaea, Ordineque Nationum Unitarum agnoscitus est Praeses legitime electus; tamen de facto bellum agitur, quod circa 400 mortuos necnon vulneratos effecit. Ouattara adversario suo proposuit  ut vocem Nationum Unitarum vicinarumque nationum exaudiret ne plures Eburneani morerentur petiitque ut pacem tamdem conciliarent.

Hoc bellum etiam oeconomiae nocet sicut bellum Libycum, nam Litus Eburneum caffeam et cacaum maxime prae reliquis exportandi causa producit. Allanus Juppé rerum exterarum minister Francogallus putat mox Laurentium Gbagbo, quem obsidione oeconomica premunt, a potestate quam illicite tenet discessurum esse;  interea incolae Eburneani in vicinam Liberiam emigrant.

Scripsit Paulus Kangiser