Foederati Arabici interdictum volandi poscunt

Civitates foederatae Arabicae Saturni die Consilium Securitatis hortatae sunt, ut cuidam Libyae parti volatu interdiceret. Ad conventum, quem foederati Arabici ad hac rem constituendam egerunt, legati regiminis Libyci non erant admissi. Iam mense Martio ineunte Libya ab hoc foedere exclusa erat. Quamquam Youssef bin Alawi bin Abdullah, minister Omanianus rerum exterarum, affirmavit omnes de eo consilio consensisse, legatos Syriae, Algeriae, Sudaniae, rei publicae Iemeniticae non assentitos esse pro certo habetur. Utcumque se habet res: foederati in eo consentiunt, ne qua civitas externa in Libya interveniat.

Iam ex compluribus diebus de interdicto volandi disputabatur. Quo interdicto efficiatur, ut copiae Gaddafianae prohibeantur, ne scelera contra populum seditiosum committant. Sed non est dubium, quin ad hoc interdictum obtinendum vi adhibenda opus sit.

Amr Mussa, qui huic foederi Arabico praeest, de „actione humana“ locutus est: populo Libyco adesse oportere, qui „cum tyranno, qui ius humanum despiceret, pro libertate pugnaret.“

Interim in Libya regimini fideles cum seditiosis pugnare pergunt. Urbs Ras Lanuf denuo a copiis Gaddafianis capta esse dicitur. Saif al-Islam, filius tyranni, copias suas iamiam victuras esse pro persuaso habet. “XC centesimae Libyae in custodia nostra sunt”, inquit. “Brevi bellum confectum erit. At isti seditiosi non cogitant de democratia, de suffragiis. Nihil enim sunt nisi terroristae.”

Scripsit Volfgangus Austriacus