Annus
2 0 1 1


Libya et Praeses Berlusconi

Libya et Praeses Berlusconi

Perturbationes in Libya Mahumeto Gaddafi, in Italia Praesidi Berlusconi minantur.

Mense Augusto anni 2008 Italia et Libya foedus sanxerunt, ex quo Italia Libybus praecipua socia commercialis facta est atque Libya promisit ne plures immigrantes in Europam illegitime transirent, neve expulsi in Libyam revertentes repellerentur; exinde Itali ampla negotia in Libya gerunt vel commercium nummarium et praediale (sive immobiliare) atque licitationes suscipiunt ad aedificia operaque publica exstruenda et ad instrumenta militaria vendenda. Harum rerum summa fere 40 milia milionum euronum annua putatur; praeterea ex Libya gasum in Italia fertur, quod ad officinas industrialemque actuositatem magnopere interest.

Praeses Berlusconi blandis levibusque verbis violentam coercitionem adversus oppositores in Libya vix damnavit, quam ob rem domi et foris vituperatus est. Mahumetus Gaddafi in mensa nummaria Italica Unicredit vocata, partes actionarias habet atque in factione pedilusoria Taurinensi "Juventus" ei pars est fere decima.

Exitium politicum si erit in Libya, commercium, adhuc prosperum, his duabus nationibus valde laedetur; forsitan de hac re Praeses Berlusconi accusabitur, oeconomicos enim proventus multis acerbe minuentur. Cui non solum in re politica sed etiam in iudiciis res adversae minantur. Die sexto mensis Aprilis Mediolani apud iudices Silvius Berlusconi aderit accusatus puerilis prostitutionis fovendae (casus est puellae Marokianae Ruby vocatae); poena sit, si culpabilis iudicetur, usque ad annos carceris quindecim. His diebus iudicium in eum reponitur de vectigalibus insolutis, et mense Martio aliud de corruptione et fraude fiscali incipiet.

In historia politica Italica Silvius Berlusconi non libidine et iudiciis unice notus esset si temperantia uteretur. Quamvis ad summam dignitatem comitiis democratice elatus sit, tamen eius indoles naturales limites neglegit imaginemque suam ipse videtur sponte cupire delere.

Scripsit Paulus Kangiser



Retro ad:

Novissima editio
Summum paginae