Iam satis superque, Berlusconi!

Cum ex nonnullis mensibus in Italia de nulla alia re ageretur nisi de vita sexuali Silvii Berlusconi, plura centena milia mulierum die dominico vias frequentabant, ut primo ministro reclamarent. “Ora basta!”, id est: “iam satis superque” clamitantes poscebant, ut plus dignitatis mulieribus tribueretur. In nonnullis urbibus Italiae meridianae mulieres flores in manibus tenebant, quod signum esset reverentiae ac dignitatis mulierum. In urbe Roma una fere millio hominum in Plateam Populi convenerat. Chartae pictae conspiciebantur: in aliis imago Berlusconii proboscide suilla mutata est, in aliis primo ministro podices nudi ostendebantur.

Quod Berlusconi in domo sua convivia luxuriosa apparaverit, quibus meretrices impuberes interfuerunt, multae mulieres Italicae indignatae sunt: his factis eum omnem modum modestiamque excessisse. Plurimae artifices, scriptrices, mulieres in re publica versantes per interrete populum hortatae sunt, ut per totam Italiam ei rei reclamaret. Praeterea plus C milia mulierum declarationem subscripserunt, in qua imaginem mulierum publice pervulgatam vehementer vituperaverunt. Illi reclamationi etiam permulti viri interfuerunt.

Mulieres praeterea querebantur, quod detrimentum sibi afferretur in opere quaerendo, deinde, quod parum invenirentur, qui liberos earum  curare possent.

In Italia secunda quaeque mulier sine opere est.

Scripsit Volfgangus Austriacus