Dux Tsetsenorum caedem Moscoviae factam confessus est

Doku Umarow, caput rebellatorum Tsetsenianorum, confessus est se caedem iussisse, quae mense Ianuario in aeroportu Moscoviensi facta est. Umarow, qui se "phylarchum Caucasiae" appellat, per taeniam visificam plures eius generis caedes minatus est: annum MMXI sanguine lacrimisque abundaturum. Caede Moscoviae facta se gratiam rettulisse pro "sceleribus, quae Russi in Caucaso commisissent".

Umarow iam antea nuntio in eadem pagina interretiali promulgato dixerat bellatores fanaticos Caucasia septemtrionali ortos "fratrem quendam ad res speciales gerendas" Moscoviam misisse mentione aeroportus Domodedowo scilicet non facta.

Caede in aeroportu internationali "Domodedowo" a.d.IX.Kal. Feb. facta XXXVI homines perierunt, plus centum vulnerati sunt. Investigatores iam mense Ianuario exeunte declaraverunt fieri posse, ut insidiae ab adulescente XX annorum factae sint. Quem quam plurimos peergrinos occidere voluisse. Non casu factum esse, quod in ea aula, in quam peregrini advenientes convenirent, pyrobolo se ipse laniavisset.

Scripsit Volfgangus Austriacus