Turcia civitatibus Mahumetanis exemplari est

Ex percontatione in civitatibus Mahumetanis facta apparet Turciam veluti exemplar democratiae Mahumetanae a plurimis laudari. Cum homines interrogati essent, quid de Turcia sentirent, magna eorum pars respondit religionem Mahumetanam cum democratia in Turcia feliciter esse coniunctam. Investigatores instituti spectatissimi "Tesev" ad MMCCC homines in Aegypto, Iordania, Libano, Arabia Saudica, Syria, Iraquia, Irania, Palaestina viventes de ea re percontati sunt. Quorum plus LX centesimae censuerunt fieri posse, ut Turcia ceteris civitatibus Mahumetanis exemplari esset.

Plus LXXXV centesimae eorum optime de Turcia existimaverunt. In comparatione percontationis ab eodem instituto anno MMIX factae Turcia nunc pluribus quam antea hominibus grata est.

Scripsit Volfgangus Austriacus