Vigiles Albani reclamantes interficiunt

Tiranae, in capite Albaniae, lugetur, cum tres homines, qui regimini reclamaverunt, a vigilibus publicis interfecti sint.

Plura centena reclamantium media in urbe convenerant moderatores hortaturi, ut munere se abdicarent. Illi ante sedem primi ministri congregati lapides aliasque res in vigiles coniecisse et impetum in curiam fecisse dicuntur. Quin etiam arbores eos incendisse fama est.

Cum vehiculo portam perfringere conarentur, vigiles in eos sclopetare dicuntur tribus e proximis interfectis.

Partes Albanae iam pridem inter se discordabant. Post electionem anno MMIX habitam socialistae democratas regentes criminis falsi insimulaverunt. Quamquam etiam Unio Europaea contendit, ut partes discordes inter se placaret, non fieri potuit, ut controversiae earum sedarentur primo ministro Berisha recusante, ne suffragia denuo numerarentur. Quin etiam tabellae ad illam electionem pertinentes iussu magistratuum combustae sunt.

Moribus quoque corruptis Albania vehementer urgetur: Ilir Meta, minister rerum oeconomicarum, munere se abdicavit taenia visifica promulgata, ex qua taenia apparet Metam proscriptionem ergasterii hydroelectrici exstruendi commutavisse.

Scripsit Volfgangus Austriacus