Annus
2 0 1 1


El Baradei regimini Aegyptio reclamare vult

El Baradei regimini Aegyptio reclamare vult

Seditione in Tunisia facta regimen quoque praesidis Hosni Mubarak in periculo est. Mahumetus El Baradei, qui antea consilio internationali praefuerat, cui res atomica commissa est (IAEA): "Non potest fieri" inquit, "quin res mutentur". Se id agere, ut cives nulla vi adhibita regimini reclamantes ab electionibus praesidiatus, quae essent mense Septembri, se abstinerent; se sperare hoc modo regimini finem factum iri.

Baradei hoc tempore contendit, ut cives petitionem subscribant democratiae instituendae: unam fere millionem Aegyptiorum eam petitionem adhuc subscriptione sua probavisse. "Quo plures subscribent", inquit, "eo magis regimen urgebitur statu legitimo imminuto".

Se quidem sperare fore, ut res iam ante electiones mutentur; sin aliter, se cives hortaturum, ut electionibus se abstineant. Ita fore, ut vera natura regiminis appareat, scilicet regiminis , in quo summa potestas penes paucos sit.

El Baradei imprimis multitudinem iuvenum appellavit: quos enim, cum ulla spe deiecti essent, nil iam timere, cum seniores aut aequo animo res ferrent aut potestatem regiminis timerent. Quem timorem non esse mirum, cum homines in vincula conici ac torqueri solerent.

Quod ad se ipsum pertineret, El Baradei negavit se praesidiatum petere, nisi electionibus liberis aequisque. Rebus non mutatis sibi quidem non licere praesidiatum petere. Quod nullis scilicet candidatis licere nisi regimini probatis.

El Baradei, qui civitatem Aegyptiam funditus mutare in animo habet, "nova domus nobis aedificanda est", inquit, "in qua omnibus eadem iura et officia sunt. Hoc tempore XLII centesimis Aegyptiorum ne unus quidem dollarius in die suppetit, XXVIII centesimae neque legere neque scribere sciunt. Condicio civitatis in dies peius fit".

Scripsit Volfgangus Austriacus



Retro ad:

Novissima editio
Summum paginae