Sole solito prius orto Groniani sollicitantur

Biduo prius, quam solet, nocte arctica finita sol hoc anno in Gronia (Groenland) ortus est. Statio radiophonica Groniana solem, qui in urbe Ilulissat Idibus Ianuariis oriri solet, iam meridie Martis diei apparuisse nuntiavit, id est a.d.III. Id. Ian.

Incolis eius urbis ea re sollicitatis viri docti causas astronomicas excludunt. Wolfgang Lenhardt, geophysicus Vindobonensis: "Status siderum certe non mutatus est", inquit, "sin aliter, iam pridem tumultus in toto orbe ortus esset". Ceterum motus et terrae et siderum diligentissime observari.

Etiam Thomas Posch, astronomus Vindobonensis, negat causam noctis arcticae praemature finitae in rebus astronomicis esse; veri simillimum esse horizontem glacie soluta depressiorem esse. Praeterea fieri posse, ut crystalla glacialia imaginem lucis receperint.

Scripsit Volfgangus Austriacus