Iudaei orthodoxissimi tumultus faciunt

In urbe Bet Shemesch Israeles orthodoxissimi reclamationibus vetitis tumultus fecerunt lapides in vigiles publicos conicientes, receptacula purgamentorum incendentes commeatumque impedientes. Ex quibus tres comprehensi esse dicuntur. De urbe Bet Schemesch nuperrime passim nuntiatum est, cum unus ex orthodoxissimis discipulam conspuisset, quia parum honeste vestita fuisset. Quae res etiam ab hominibus religiosis vehementer vituperata esse dicitur. Iudaei orthodoxissimi iam pridem poposcerunt, ut viri a mulieribus in publico seiungerentur. In vicis eorum tabulae reperiebantur, per quas mulieres ante synagogam ambulantes crepidine opposita uti iubentur. Praeterea eas in vehiculis publicis in locis posticis sedere et in tabernis, cum ad arcam venirent, agmini proprio se immiscere debere. Simon Peres, praeses Israelianus, interim cives hortatus est, ut pro aequitate periclitante reclamarent.

Scripsit Volfgangus Austriacus