De tribus paeninsulis Europaeis

Hispani cives parati sunt ut, rebus oeconomicis adversis, penuriam stoice ferant; sic comperitur ab exitu comitiorum, qui Marianum Rajoy reipublicae rectorem fore nuntiarunt. Is enim cordatus est neque cupit amplas oeconomicas atque politicas mutationes agere, sed id quod ad operistitium superandum necesse pertinet; eidem quoque faverunt cives qui factionem socialisticam secuti erant, quia Rodríguez Zapatero (Sutor) eos fefellerit. Praeterea dexterani plurimi ad comitia adfuerunt dum multi siniestrani domi permanserunt, quorum vero candidati in postulando affirmabant Marianum Rajoy, si vinceret, omnia vel multa beneficia publica esse suppressurum. Sinistrani enim largificam rempublicam (welfare state) amant, ita ut medicinae et educatio et securitas socialis omnibus gratis a fisco dari oportere exsistiment. Inde quidem status oeconomicus valde laesus, magnis expensis quaestuque deficiente, multique operarii operistitio afficiuntur.

In Italia Marius Monti oeconomista, qui in Commisione Europea commisarii munere 9 annos functus est, administrationem fiscalem reformandam censet. Itaque vectigal valoris additi, quod Silvius Berlusconi de viginti centesimis (20%) ad unam et viginti (21%) auxerat, Monti putat ad viginti tres (23%) esse perducendum, et augendum quoque primae domus emptae vectigal. Dicitur respublica a technocratis nunc esse regenda, ipse Monti esse oeconomista, qui aliquas penurias a civibus deberi tolerari censeat, adeo ut arca fiscalis reintegretur et Italia in Euronationibus maneat.

Luca Parademos etiam oeconomista rempublicam Graecam regendam aliquos dies abhinc suscepit; at nolit litteris promittere se obtemperaturum esse condicionibus a Fundo Monetali Internationali impositis, ut Graecia pecuniam acciperet ad gravissimum statum superandum: fides a se data sufficiat. Quamvis hiuis ministri primarii verba sint honestissima, Angela Merkel et Nicolaus Sarkozy, e quibus opes praecipue venirent, id non sufficere censent. Papademos vero ­ ait - si scriptum signaverit dignitas nationalis laedatur; fortasse cives Graeci perperam videbunt nexum rite et sancte confectum. Praeterea - ubique perspicitur - in hoc summo discrimine res mensariae male se habent propter eos qui nuper fidem datam fefellerunt vel rationes fiscales finxerunt.

Omnia igitur ab hoc pendunt: utrum politici ceterique cives ab oeconomistis et technocratis se sinant gubernari annon.

Scripsit Paulus Kangiser