Putin vasa antiqua ex imo mari promit

Vladimirus Putin, primus minister Russiae, denuo audaciam suam ostentavit, cum photographis praesentibus ad reliquias Phanagoriae, oppidi Graeci antiqui, in aquam se demersit. Quem paulo post in summum mare redeuntem duoque vasa antiqua manibus tenentem imagines televisificae monstrant. Ridens „ecce thesaurus“, inquit, „qui originem a sexto p.Chr.n. saeculo habere dicitur.“ Tamen primum ministrum duo tantum metra in altitudinem se demisisse nonnulli diurnarii affirmabant.

Putin audaciam suam identidem prae se ferre solet: modo aeronave militari in Tsetseniam volavit, modo nave subaquanea ad profunda lacus Baikalii se mersit. Praeterea imagines eius conspiciebantur pectore nudo piscantis aut venantis.

Scripsit Volfgangus Austriacus