Annus
2 0 1 1


G8

G8

“Da mihi quoque, Carola, basium!” “Minime tibi, Silvi!”

In conventibus, quibus maximi rectores intersunt, ritus substantia rerum est.

Abhinc paucos dies G8 nationum rectores in urbem gallicam Deauville convenerunt, ubi de mutationibus in Africa et in Asia proxima evenientibus, de discrimine oeconomico et de periculis ad officinas nucleares attinentibus, disputaverunt.

In summa haec statuerunt: subsidia pecuniaria illis nationibus praebere, quae civibus libertate et operibus provideant; incremento oeconomico aequo fovere, quod rerum naturam servet; vim nuclearem electricam penitus perdiscere, ita ut nucleares officinae tutae sint magis quam antea. Ut fieri solet, qui conveniunt, eos benigne salutat nationis rector qui conventum paravit. Etenim Sarkozyus eiusque uxor Carola (praegnans, fulgens et eleganter induta), omnes rectores ante palatii ianuam benigne salutaverunt; Carola omnes hospites osculavit, omnes praeter … Berlusconium, cui dexteram porrexit et “salutem” dixit subridens. Omnibus constat Berlusconium magni non existimari (mores eius indigni in orbe terrarum noti sunt), ne a Carola quidem (quae, tempore praeterito, adfirmavit se, Berlusconio “imperante”, italico genere natam esse paululum pudere).

Qua ex re idem collegit se minoris haberi quam ceteros rectores. Vultu tristis is, qui neglegi non patitur (saepe accidit ut maximi rectores de gravibus mundi rebus sine Berlusconio disputent), Obamae primum, Medvedis postea, animos avertit, quorum miserationem movere conatus est. Iisdem adfirmavit se a sinistris iudicibus vexari. Obama et Medvedev eius maesta verba taciti audiverunt, non sine dubio quin Berlusconius suas culpas, in orbe terrarum omnibus notas, cum tegere vellet, sinistros et sibi inimicos iudices existimaret. Ubicumque terrarum, in rebus publicis quae populariter geruntur, reus, etsi magni momenti est (de preside israeliano Katzav loqui non opus est), iudicium non recusat. Berlusconius autem, cum sibi maior legislatorum pars sit, se omnia posse putat, Legibus Superioribus solutum.

“Da mihi quoque, Carola, basium!” “Minime tibi, Silvi!

In conventibus, quibus maximi rectores intersunt, ritus substantia rerum est.

Scripsit Dominicus Caveosanus



Retro ad:

Novissima editio
Summum paginae