De caedibus Syriacis

Foedus oppositorum nuntiat usque ad hunc diem CCL homines a Lunae die interfectos esse et vehementer postulat, ut ONUs Consilium securitatis et Foedus Arabicum cito conveniant ut de factis cruentis disserant et populum Syriacum defendant, finem auctoritatum violentiae quam primum imponendo. Amplius centum milites, qui deserere vellent, in duobus stationibus occisi sunt: hoc refert Sodalitas Syriaca iurum humanorum speculatoria.

Ordo Nationum Unitarum existimat a mense Martio, cum contra praesidentem Bashar al-Assad reclamari coeptum est, quinque milia hominum circiter enectos esse.

Interea Persarum regimen ait quinque viros Iranicos qui Homsae, in urbe Syriaca, apud officinam electrificam operam dare soliti erant, ab ignotis abreptos esse eorumque libertatem expetit.

Scripsit Herimannus Novocomensis