Pecunia mutua Graeciae danda retinetur

Graeci promissam summam octo milium milionum euronum non accipient, donec populus suffragiis consilia opulentarum Europae nationum adprobet ad nummum communem servandum: hoc constituerunt Gallorum praesidens et Germanorum cancellaria Canuae, in oppido litoraneo ubi ab Jovis die habebitur XX ditissimarum civitatum Conventio (G 20). Tam Nicolaus Sarkozy quam Angela Merkel ob inexspectatam Georgii Papandreou praesidentis Hellenici deliberatione obstupuerunt, qui dixit populum mense proximo de severis condicionibus Graecis civibus impositis probandis suffragiis deliberaturos esse. Cui confestim convocato nuntiaverunt Graeciam, civibus denegantibus, ab euronis usu exclusum iri.

Fora mercatoria Martis die vehementer perturbata erant, postquam Georgii Papandreou consilium patefactum est.

Scripsit Herimannus Novocomensis