De indignatorum reclamationibus

Idibus Octobribus reclamantes Romam convenerant a tota Italia iam multo mane ut interessent Diei Mundano indicto ab iis qui se declaraverunt ”indignatos” esse de re politica argentariarum et mercatuum totius orbis pecuniariorum: circiter bis centum milia, non solum iuventus sed etiam parentes cum liberis anxii vitae futurae, in Foro Rei Publicae adesse existimabantur ex computatione   eorum qui publicum concursum exstruxerant:. Post meridiem hora octava agmen “indignatorum” ab eodem Foro profectum est. Sed statim grex vehementium vestimentis nigro colore indutis vultibus celatis totius capitis tegumentis duo autocineta incenderunt et palum indiciorum viariorum divellerunt; deinde cum homines nefarii in fugam se dedissent pacificorum multitudo rursus se composuit dum a lateribus viarum fumi incendiorum in altitudinem extolluntur. Sed continenter iter reclamantium pacificorum seditionibus turbatum est in viis mediae urbis usque ad Forum Sancto Johanni dicatum.

Hic pugna incepit inter custodes publicos et tumultuantes cognominatos “black bloc”(moles nigra), cum pacifici in periculo versantes in basilicam confugere conarentur. Grex instructus vehementium   quem alteri putant centum alteri quingentorum hominum fuisse parva autocineta oneraria custodum pyrobolis chartaceis adortus est. Usque ad vesperum concursus producti sunt incensis autoraedis, purgamentorum capsis, ex aliqua parte aedificiis publicis, magno emporio, ruptis vitris argentariarum: quid multa? Media pars Urbis ferro ignique vastata est. Constat septuaginta fere sauciatos esse, tres graviter sed neminem interisse.

Primi indignati fuerunt iuvenes Hispaniae (indignados); ex quibus reclamationes pervulgatae sunt in orbem: eodem die quo Romae proelium urbanum factum sit in octoginta urbibus exteris publici conventus evenerunt, nusquam tanta vi adhibita .

Postero die decem nefarii adolescentes detenti sunt, dum de ceteris investigandum est. Omnes partes “molis nigrae” vim improbaverunt ut intolerabilem, quamvis inter se de ratione violentiae vitandae discordent. Praeses Rei Publicae Giorgio Napolitano suum consensum ad custodes publicos declaravit de officio impleto.

Scripsit Lydia Ariminensis