De Al Caëdae duce interfecto

Baracus Obama, praesidens Civitatum America Unitarum, magno cum gaudio mortem Anvari Al Avlaki, USAe civis ex Iemenita familia orti, salutavit: qui in Iemenia fuci Americani ictu cum aliquot sodalibus interfectus est. Anno praeterito USAe praesidens iam eundem tromocratam necari iusserat, sed ille plus quam semel insidias effugit. Anvarus putatur nonnullorum impetuum contra USAe cives consilia cepisse et complures cives Iemenitas occidendos curavisse.

"Ita - ait Baracus - saxum miliare conditum est in Al Caëda eiusque sociis omnino profligandis. Nusquam Al Caëda portum securum inveniet!" Baracus gratias egit non solum USAe investigatoribus sed etiam Iemeniae militiis, quae assidue ad facinus perficiendum operam dedissent. Minister rei bellicae Iemeniae paulo ante virum enectum esse nuntiaverat.

Scripsit Herimannus Novocomensis