De feminarum Sauditarum suffragiis

“Etiam feminis ius suffragii dabitur”: sic hesterno die rex Arabiae Sauditae Abdullah loqui ingressus est pro Summo Consilio Ad Deliberandum (Shura) cuius viri ab ipso dominatore designantur. Quod tamen impartietur ab anno 2015: feminis facultas erit eligendi sed etiam iisdem eligi licebit ac rem publicam adire ut participes Summi Consilii et Consiliorum Municipalium fiant. Interdum suffragiis indictis in diem III ante Kalendas Octobres prohibitae sunt. Quod accidit num primus flos “veris Arabis” putandum est?

Cursus ad aequalitatem iuris assequendam perlongus ostenditur. Nam mulieres Sauditae maximo discrimini subiectae sunt: iis, viro invito, non licet exire domo, iter facere, a medico secari. Nec cuilibet disciplinae studere possunt nec quicquam indignum quod putetur exercere: denique nullam fere artem conceditur iisdem factitare. Etiam autoraedam vel birotam vehere vetitae sunt.

Non omnes feminae promissis fidem tribuunt: suffragia quinto quoque anno haberi; cum rex iam admodum senex sit, futuras res in incerto esse. Femina Saudita Madawi Al-Rasheed, quae docet Anthropologiam Religionis apud Regium Collegium Londiniense negat in patria esse feminis commutationem rerum: totam regionem in seditione esse, dominationem regis periclitari: quod permissum sit merum blandimentum videri. Ex eius sententia non satis est aliquas feminas adesse in Summo Consilio, nisi electae sint a populo. Nisi Senatus liber nulla spes mutationis in melius exoriri possit.

Scripsit Lydia Ariminensis