Discordiae inter Israeles et Turcos crescunt

Discordiae inter Israeles et Turcos crescunt discordiae inter Israeles et Turcos ortae in dies crescunt. Cum Recep Erdogan, primus minister Turciae, minaretur naves longas classem Gazanam proximam comitaturas, Avigdor Lieberman, minister Israelianus rerum externarum, Armenios et Kurdos, inimicos Turcorum, sibi conciliare vult. Discordia renovata est, cum Nationes Unitae quaestionem de impetu Israeliano in navem Turcam auxiliariam “Mavi Marmara” appellatam exercuissent. Initio huius septimanae legatus Israelianus Turciam exire iussus est. Quin etiam commercium rerum militarium, quod antea valebat, sublatum est. Accedit, ut opiniones anti-israelianae, quae non solum apud Arabos, sed etiam in toto orbe terrarum praevalent, Turcis faveant. Quid mirum, si Erdogan, cum propediem in urbem Kairo pervenerit, occasione data moderatores Aegyptios contra “vicinum zionisticum” denuo incitabit, praesertim cum Aegypti de V vigilibus ab Israelibus occisis vehementer sint indignati?

Incertum est, an Erdogan Gazam quoque visitaturus sit. Non est dubium, quin Hamas ei sit grata. Turci non solum petiverunt, ut Israeles de novem Turcis occisis satisfacerent, sed etiam, ut Gazani commeatu maritimo non iam intercluderentur. Quod Israeles negant scilicet veriti, ne arma in Gazam importentur. Quis ergo dubitet, quin iterum classis auxiliaria in Gazam profectura sit? Num fiet, ut naves longae eam comitentur? At Lieberman „Turcis monstrabimus“, inquit, „operae pretium non esse, si Israeles lacessiverint.“ Immo eos Israelibus honorem ac reverentiam tribuere debere.

Aliter sentit Dan Meridor, minister officiorum secretorum, cum dixit in ea re tacendum esse. Similiter Ehud Barak, minister rei militaris: „nec Turci hostes nostri fient“, inquit, „nec nostra interest eos hostes fieri.“ Sibi esse persuasum has discordias praeterituras. Alon Liel, qui olim legatus apud Turcos fuerat, pro persuaso habet tantas discordias sedari non posse veritus, ne Israelia magis magisque segregaretur: «decem abhinc annis», inquit, «novem apud nos erant legationes civitatum mahometanarum. Hodie sunt tres: Turcorum, Aegyptiorum, Iordaniorum.»

Scripsit Volfgangus Austriacus