De dictatoris familia effugiente

Mahometus Gaddafi cum liberis Saif et Saadi a nuntiis legatorum fertur, ut effugeret a rebellibus insequentibus, se contulisse Bani Walid, quod oppidum abest circiter centum chiliometra a Tripoli, spectans inter meridiem et ortum solis. Ante duos dies agmen sexaginta vel octoginta vehiculorum militum fidelium in regionem eiusdem oppidi contendere conspectum est.

Ducis familia autem, ex iisdem nuntiis, id est mulier cum ceteris filiis Aisha, Hannibale et Mahometo narratur in Numidiam confugisse. Khamis filius ducis minimus natu creditur fugiens ad Bani Walid versus gravissime vulneratus obisse impetu ab alto helicopteri Britannici: incursum Tripoli circiter sexaginta chiliometra distante accidisse: vehiculum quo is iter faceret missile collineatum esse. Cui nuntio etiam dux rebellium Mahadi Al-Haragi Tripoli fidem addidit. Familia Mahometi Gaddafi in Numidiam accepta est, ut auctoritates affirmaverunt, sensibus humanis, ex foedere omnium gentium communi, cum Aisha gravida sit partu imminente.

Scripsit Lydia Ariminensis