De supremo certamine

Rebelles Libyci aedificiorum potiti sunt, ubi dux Mahometus Gaddafi confugisse putatur. Imagines per apparatus televisificos diffusae armatos demonstrant caput statuae invisi dictatoris effingentis et immanem manum ex auro factam (ut in imagine adposita conspicis) deicientes et calcibus percutientes eiusque domus supellectilem diripientes. Omnes tamen ignorant, utrum Mahometus ipse cum familia sua in illis aedibus sit an non. Seditiosi, qui se omnes fere Tripolis insulas occupavisse confirmant, Martis die mane plurimis potentibus autoraedis transportati post quinque horas unum ex maximis cancellis vi diruerunt, palatii limina transgredientes.

Scripsit Herimannus Novocomensis