De Hugonis Chávez dubia valetudine

Multi in America iam aliquos dies scire cupiebant quid in nosocomii cella, ubi iaciebat Hugo Chávez, medici Cubani agerent, nam Praeses Venetiolanus ad eos aegritudinis curandae causa iverat; sednon solum de valetudine sed etiam de rebus futuris in insula Cubana, et in ipsa Venetiola aliisque nationibus erat sollicitudo. Quas omnes Hugo Chávez petrodollaribus fovere solet.

Multi etiam quaerunt quid accideret si Praeses morbo excederet e vita. Cubanis Gubernatoribus Hugonis Chávez salus est condicio necessaria ut reformationes oeconomicae possint in insula fieri, nam ex Venetiola cadorum 100 milia petrolei cottidiana fisco Cubano favent. Interea ob internum fastidium externasque criminationes periculum instat super capitibus fratrum Fidelis et Radulfi Castro, qui pecunia ab Hugone Chávez praebita maxime egent ut summam in insula servent potestatem. Hac de causa Cubani his diebus sentiebant easdem dubitationes quibus afficiebantur cum ex Unione Sovietica dirupta auxilium iam non essent accepturi.

Itaque Praeside Chávez valido, fratres roborantur; eo impedito sive infirmo, hi possent amittere brevi potestatem. Sub oculis igitur praebitum est nobis exemplum imperii, quod, institutionibus politicis deficientibus, uni soli pertinet, nam omnia ab unius vita pendunt, ab eo scilicet qui firma valetudine potuit clamitare, contumeliose dicere, minari, promittere, at sine valetudine omnia videntur periclitari.

Scripsit Paulus Kangiser