Basescu bellum nazistarum laudat

Traianus Basescu, praeses Romaniae, Romanianos anno MCMXLI una cum nazistis Unionem Sovieticam aggressos esse comprobavit. Cuius sententiae Russi vehementer repugnaverunt.

Basescu in percontatione quadam televisifica dixerat se ipsum, si illo tempore Romanianis imperavisset, milites iussurum fuisse cum exercitu Germanico in Russiam iter facere. Praeterea nazistas “socios suos” appellavit.

Haec dicta minister Russus rerum externarum vehementer vituperavit. „Non possumus tolerare“, inquit, „ista dicta vaniloqua et impudentia, quibus et bellum nazistarum comprobetur et memoria innumerabilium hominum dedecoretur, qui a nazistis necati sunt.

Civitates Europaeas, in quibus cultus atque humanitas valent, ab ista Traiani Basescu sententia abhorrere oportet, eo magis, quod lugubri illo die haec dixerat, quo die LXX abhinc annis Bellum Patrium Magnum ortum est, quo bello XXVII milliones Russorum perierunt.“

Basescu de indignatione Russorum miratus dixit verba sua ad pristinam Unionem Sovieticam, non ad Russos pertinuisse.

Scripsit Volfgangus Austriacus