Hilaria Clinton animosas feminas Saudianas laudat

Postquam divulgatus est nuntius, multas feminas Saudianas - quibus autoraedas conducere interdicitur - se ipsas videpohonio legem perfringentes impressisse et imagines per interrete propagasse, Civitatum Americae Unitarum segretaria rebus exteris addicta Hilaria Clinton palam collaudavit animosas mulieres ius conducendi reclamantes. Quarum una septimana praeterita ab astyphylacibus comprehensa et in vincula coniecta est, quod illud facinus perpetraret. "Animosum est id - inquit - quod mulieres illae agunt, ius legitimum persequentes! Ego ipsa commoveor et auxilium feram." Se tamen minime interposituram esse rebus internis regni Sauditi, fidi USAe socii.

De re Hilaria collocuta est telephonice cum collega suo principe Saudio al-Faisal: quod parum aptum visum est reclamantibus Saudianis, quae: "Secretaria Hilaria, - inquiunt - non prudentia nunc opus est, sed ut ipsa ius conducendi fortiter simpliciter publice suffulcias."

Scripsit Herimannus Novocomensis