De Graeciae aere alieno

Posquam minister primarius Hellenicus Georgios Papandreou nonnullos ministros permutandos esse nuntiavit, praesidens Gallorum Nicolaus Sarkozy et cancellaria Theodisca Angela Merkel Berolini coniunctim proclamant pactionem quam citissime perficiendam esse, ut Graecia aere alieno oppressa servetur. Evangelos Venizelos minister rerum oeconomicarum creabitur. Georgios dixit patriam novissimae aetatis summa pericula subituram esse. Antea duo ductores maximarum Europae civitatum referebantur de Graeciae salute aliter sentire, sed sollicitudo de nummo Europaeo sustinendo hodie praevaluit.

Scripsit Herimannus Novocomensis